كۆلیژا زمانان پێدڤییە ببینە ناڤەندەکا هەرە سەرەکی و نایاب د فێرکرنا زمان و ئەدەبیاتا زمانێن گرنگێن جیهانی و هەرێمی ب گشتی و پەروەردەکرن و ناساندن و ئاشناکرنا زمان و ئەدەبیاتا کوردی ب جیهانا دەرڤە و جیهانا ناڤخوییدا ب تایبەتی. زێدەباری بەرهەڤکرن و پێگەهاندنا بسپور و ڤەکۆلەرێن خودان شیان و ڕەوشت بەرز کو هەست ب بەرپرسیارەتیێ ل هەمبەر جڤاکی بکەت بۆ پشکداریکرن د بەرەڤ پێشڤەبرنا ئاستێ زانستی ــ ب تایبەت د بیاڤێ زمان و ئەدەبیاتێ ــ د ئاستێ خوجهی و هەرێمی و جیهانی دا.

ب دەربرینەکا دیتر کۆلیژا زمانان خۆ د ئەوێ چەندێدا دبینیت کو ببیتە ناڤەندەکا پێشەنگ و داهێنەر د ئاستێ نشتیمانی و هەرێمی دا بۆ ئاڤاکرنا جڤاکەکێ رەوشەنبیر و گەهاندنا جیهانبینیا کوردی بۆ دەرڤە، ئەڤ دیتنە پشتبەستنێ ل سەر پەرەپێدانا هێز و شیانێن زمانڤانی و ڕەوشەنبیری یێن قوتابیان دکەت، داکو د پاشەروژێدا د شیاندابن وەک پرەکا کولتوری و زانستی د ناڤبەرا جڤاکێ خۆ و جیهانا دەرڤەدا کار بکەن. ب ئەڤێ چەندێ کۆلیژا مە دێ بیتە بنگەهەک بۆ پاراستن و پێشڤەبرنا زمانێ دایکێ (کوردی) و د هەمان دەمدا ڤەکرنا دەرگەهێن دیالۆگێ دگەل زمان و کولتورێن دەوروبەر و بیانی ب رێکا ئەنجامدانا ڤەکۆلینێن زانستی یێن هەڤچەرخ و سەردەمیانە و پشکداریکرنەکا کاریگەر د پێشڤەبرنا جڤاکی دا.