پشکا زمانێ فارسی
پشکا زمانێ فارسی:
پشکا زمانێ فارسی ل سالا ٢٠٢٥ێ هاتییە ڤەکرن و د ئێکەم خۆلا وەرگرتنا قوتابیاندا (٣٠) کورسی هاتنە داخوازکرن؛ لێ د ئەنجامدا (٢٢) قوتابییان خوە تۆمارکرن.
دیتنا پشکێ:
ئەڤ پشکە وەک ئێک ژ گرنگترین پشکێن گرێدای ب کۆلیژا زمانانڤە دهێتە هژمارتن؛ چونکی وەک ئێک ژ ئەندامێن بنەمالا زمانییا ( هندوئەوڕۆپایی) و (هندوئیرانی)ییە و نێزیکییەکا زۆر یالگەل زمانێ کوردی هەی. زێدەباری هندێ کو دوو جیرانێن گرنگێن هەڤن و هەڤکاری دبوارێن بازرگانی، سیاسی وجڤاکی و ڕەوشەنبیری و ... یێن هەین؛ لەوڕا ئەم د ئەوێ باوەرێ داینە کو کەلتوور و فۆلکلۆر و ئەدەبیاتا زمانێ فارسی و کوردی، ب بەرفرەهی تێکەلی هەڤ بووینە و ئەڤێ چەندێ ژی کاریگەری لسەر زاراڤ و پەیڤ و دەستەواژەیێن فارسی کرییە. لەوڕا ب گرنگ دزانین کو ئەڤ زمانە، مل ب ملێ زمانێن دیترێن ئەڤێ کۆلیژێ بهێتە خواندن و قوتابییێن کوردستانێ ژی ب هویری و زانستیانە فێری زمانی فارسی و ئەدەبیات و کەلتوورێ وەلاتێ ئیرانێ ببن.
پەیاما پشکێ:
ب هەمی کەیفخوەشی و سەربلندیڤە، ئەم شانازییێ ب ڤەکرنا پشکەکا زمانی دکەین، کو هێزا کاریگەرییا ئەدەبییا ئەوێ د جیهانا ئەدەبیاتێدا ژ ئێکەمانە و دێ شێین نڤشێ نوییێ وەلاتێ خوە، فێری ئەڤی زمانی کەین و ڕێکا گەهشتن ب گەنجینەیا ئەدەبیات و کەلتوور و شارستانییەتا ئەڤی ملەتی خوەشکەین. ڤەکرنا ئەڤێ پشکێ، پێنگاڤەکا موکومە بۆ چوونا دناڤ هویرکاریێن بناخێ ئەڤێ پێشکەڤتنا هزاران سالەیا ئیرانییان، دبوارێن بەرهەمێن هوزانکی و پەخشانکی، د چارچووڤەیێن عرفان، حکمەت، عەشق و ... کو نەتەوەیا کورد د درێژاهییا دیرۆکێدا ژ هەڤبەشییا ئاڤاکرنا ئەڤێ شارستانییەتێ بێبەهر نەبوویە و بێگومان ب ئەڤێ ڕێکێ گەلەک بەرهەمێن ئەدەبی، دیرۆکی و شارستانییا کوردان، دێ هێنە دیارکرن. ئەڤ پشکە ب هاریکارییا ماموستایێن بسپۆرێن خوەڤە، دێ هاندەرێن سەرەکییێن قوتابییان بن، ژبۆ گەهشتن ب کوپیتکا زانست و زانییارییان.
کەواتە هزرا سەرەکییا ئەڤێ پشکێ فێربوونا زمان و ئەدەبیاتا فارسییە و هایداربوونا قوتابییانە ژ ڕەوشا ئەدەبی زمانی، جڤاکی و کەلتووریێ ئیرانێ و سەرەدەرییەکا زانستییانە لگەل بەرهەمێن ب زمانێ فارسی دهێنە نڤیسین؛ زێدەباری ڤەکۆلینان لسەر بەرهەمێن فارسیزمان و بەراوردا زانستییا ئەوان لگەل بەرهەمێن کوردی.
ئارمانجێن پشکێ:
- بەلاڤکرنا زمان و ئەدەبیاتا فارسی، وەک ئێک ژ زمانێن زیندی و خودان مێژوویەکا دێرینا شارستانییەتا مرۆڤی.
- شرۆڤەیا میراتا شارستانییا فارسی، ب دویڤچوونا دەقێن کەڤن، بەرهەمێن هوزانڤانێن مەزنێن ئیرانی.
- ڤەکۆلینێن زمانی و ئەدەبی، ڤەکرنا دەرگەهێ دویڤچوون و ڤەکۆلینێن زمانناسی، شێوازناسی، ڕەخنەیا ئەدەبی و گشت بابەتێن ب زمان و ئەدەبێ فارسیڤە هەی.
- گەهشتن ب هندەک پێدڤیاتییێن جڤاکا کوردی کو حەز لسەر فێربوونا زمان و ئەدەبێ فارسی هەی.
- وەرگێرانا بەرهەمێن زمان و ئەدەبێ کوردی بۆ سەر زمانێ فارسی و بەروڤاژییا ئەڤێ چەندێ.
- هایداربوون ژ وەرار و بەرەڤ پێشچوونا زمان و ئەدەبیاتا فارسی و بەراوردا ئەوێ ب زمانێ کوردیڤە.
بازارێ کاری بۆ دەرچوویێن پشکێ:
- وەک سێ ئێکەمێن پشکێ دێ ماف هەبیت، لدویڤ فەرمانا وەزارەتێ، وەک هاریکارێن ڤەکۆلەری بهێنە دامەزراندن.
- دێ شێن وەک وەرگێرێن پەرتووکان بۆ سەر زمانێ کوردی کاربکەن.
- دێ شێن ببنە وەرگێرێن ئەوان کەسێن وەک بازرگان یان نەساخ سەرەدانا ئیرانێ دکەن.
- دێ شێن کۆمپانییەکا گەشت و گوزاری بۆ خوە بدانن و گەشتییاران ژ ئیرانێ بیننە کوردستانێ و بەروڤاژی ئەڤێ چەندێ کاربکەن.
- دێ شێن ببنە پەیامنێرێن ڕادیۆ و تلەڤزیۆنێن ب زمانێ فارسی.
- ڤەکرنا خۆلێن فێربوونا زمانێ فارسی بۆ خەلکێ کوردستانێ.
- پشکداریکرن د کۆربەندێن نێڤدەولەتیدا.
