کولیژا زمانان رابوو ب سازکرنا سەمپوزیومەکێ نیڤدەولەتی ب سەرنیشانێ "وێژە وەک پڕەک د ناڤبەرا کەلتووران دا" ل رۆژا چارشەمبی ٢٠٢٥/٢/١٩ ل هۆلا کونفرانسان ل زانکۆیا دهۆکێ. ئەڤ سەمپوزیومە ژ لایێ پشکا زمانێ ئنگلیزی ڤە ب هەڤکاری دگەل پەیمانگەها ئارارات یا تەکنیکی ل دهۆکێ و زانکۆیا سەلاحەدینێ ل هەولێرێ هاتە ئەنجام دان. 

سەمپوزیومێ ب پەیڤەکێ ژ لایێ د. بەختیار سەجادی ژ زانکۆیا کوردستانێ ل باژێرێ سنەیێ ل رۆژهەلاتا کوردستانێ دەستپێکر. د پەیڤا خۆ دا، د. سەجای رۆناهی ئێخستە سەر رێبازێن رەخنەیی و تەکەز ل سەر گرنگیپێدانەکا پتر ل رەخنەیێ د ئەدەبیاتا کوردی دا. ل دیف دا و پەنەلەکێ دا ژ برێڤەبرنا د. مەروان عەبدی، سەروکێ پشکا زمانێ ئنگلیزیێ، چوار تەوەر هاتنە بەحس کرن. 

د تەوەرێ ئێکێ دا، ماموستایا ئەدەبێ ئنگلیزی ل پشکا زمانێ ئنگلیزی ل کولیژا زمانان د. لولاڤ حەسەنێ بەحس ل گرنگیا وەرگێران کر د ڤەگوهاستن و تێگەهشتنا کەلتووران دا. ل دیف دا، ماموستایا ئەدەبێ ئنگلیزی ل زانکۆیا سەلاحەدین د. شرین سەعدولایێ بەحس ل رەنگڤەدانا کێشەیێن جیهانی و جڤاکی د ئەدەبی دا کر. پانالیستا سێیێ ماموستایا ئەدەبی ل کولیژا پەروەردەیا بنیاتێ ماموستا هودا سالح ل سەر گرنگییا خاندنا بەرهەمێن ئەدەبی بۆ خورتکرنا هزرکرنا ڕەخنەیی پەیڤی. ل داویێ، ماموستایێ ئەدەبی ل پەیمانگەها ئارارات ماموستا محەمەد خۆرشیدی بەحس ل پاشەرۆژا ئەدەبی کر د سەردەمێ ژیرییا دەستکرد دا.

ل داویێ دەرفەت ب ئامادەبوویان هاتە دان کو پڕسیاران ئاراستەی پانالیستان بکەن. د ڤێ پشکێ ژی دا گەنگەشەیێن گەرم پەیدابوون و بیروبۆچوونێن جودا هاتنە گوتوبێژکرن.