ب هەلکەفتا رۆژا جیهانى یا زمانێ دایکێ، كولیژا زمانان دێ رابیت ب سازکرنا سەمپوزیومەكا نێڤدەولەتى ب ناڤونیشانێ (زمانێ کوردی سنورێ جیوسیاسیێ کوردانە) ل رێکەفتى 20/2/2025، دەمژمێر 10:00ى سپێدێ ل هولا کونفرانسان ل زانکویا دهوکێ.

ئارمانج ژ ئەنجامدانا ڤێ سەمپوزیومێ دیارکرنا گرنگیا زمانێ دایکێیە وەک زمانێ ئێکێ ل هەرێما کوردستانێ و رەوشا زمانێ کوردی ل هەرێمێ ب گشتى. ئارمانجەکا دی دیارکرنا رەوشا زمانێ کوردییە ل هەر چوار پارچێن کوردستانێ. زێدەباری ڤێ چەندێ، رەوشا زمانێ کوردی ل دەرڤەى وەلاتی دێ هێتە گەنگەشەکرن و رولێ زمانڤانێن کورد ل وەلاتێن بیانى بۆ پاراستنا زمانێ کوردی هێتە باسکرن.

بۆ ئەڤێ مەرەمێ کولیژا زمانان ب ئەرک زانیە چەند شارەزایێن زمانی مێهڤان بکەت بۆ ئاشنابون ل سەر رەوشا زمانێ کوردی ل هەر چار پارچێن کوردستانێ.

روژا 21ى شواتێ وەک روژا زمانێ دایکێ ل سەرانسەرى جیهانێ هاتیە تایبەتکرن. کولیژا زمانان وەک دەزگەهەکێ ئەکادیمى هەر سال ل رێکەفتی 21ی شواتێ بیرئینانا ئەڤێ روژێ ب چەند چالاکیان دکەت بۆ پاراستن و ڤەژاندن و بیرئینانا گرنگیا زمانێ دایکێ بۆ نەتەوەیا کوردا و پاراستنا ناسناما میللەتێ کوردا.